బ్రహ్మకు నాలుగు ముఖములు ఎలా వచ్చాయి?

రచన: హిందూమిత్ర Dr. మల్లాది శ్రీనివాస శాస్త్రి

ఆది కాలంలో—ఈ విశ్వం పుట్టకముందు—ఎక్కడ చూసినా నిశ్శబ్దం మాత్రమే. కాంతి లేదు, గాలి లేదు, నీరు లేదు… అంతా ప్రశాంతంగా ఒక అనంత సముద్రంలా ఉంది. ఆ సముద్రంపై నారాయణుడు యోగనిద్రలో విశ్రాంతిగా ఉన్నాడు.

ఒక సమయంలో నారాయణుడు కన్నులు నెమ్మదిగా తెరుచుకున్నాయి. అప్పుడు ఆయన నాభి నుంచి ఒక అద్భుతమైన కమలంబయటకు వచ్చింది. ఆ కమలంలో మొదటగా పుట్టిన జీవి బ్రహ్మ. ఆయనే సృష్టికర్త.

బ్రహ్మ చుట్టూ చూశాడు — ఎక్కడా ఏదీ కనిపించలేదు. పైకి చూసినా ఆకాశం లేదు, క్రిందికి చూసినా నేల లేదు. తనకు తాను ప్రశ్నించాడు —“నేను ఎక్కడ ఉన్నాను? ఎక్కడినుంచి వచ్చాను?”

అతను ఒక్కసారి తూర్పు చూశాడు, మరోసారి పడమర, తరువాత ఉత్తరం, చివరికి దక్షిణం చూశాడు. ప్రతి దిశలో చూసినప్పుడు అతనిలో కొత్త జ్ఞానం కలిగింది, కొత్త దృష్టి ఏర్పడింది. అలా చూసి చూసి నాలుగు ముఖములు పుట్టాయి — నాలుగు దిశల్లో చూడడానికి!

కానీ ప్రశ్న మాత్రం అలాగే మిగిలిపోయింది —“నేను ఎక్కడినుంచి పుట్టాను?”

దానికి సమాధానం కనుగొనడానికి బ్రహ్మ కమల దండులోకి ప్రవేశించాడు. లోపల లోతుల్లో ఏముందో తెలుసుకోవాలనుకున్నాడు. కానీ ఎన్ని యుగాలు వెతికినా చివర దొరకలేదు. అప్పుడతను ఆగి, ఆలోచించాడు —“బయట వెతికితే కాదు… నిజం లోపలే ఉంటుంది.”

అతను కళ్ళు మూసి ధ్యానం ప్రారంభించాడు. శతాబ్దాల పాటు నిశ్శబ్దంగా ధ్యానమునకు మునిగిపోయాడు. అప్పుడు ఆయన హృదయంలో ఒక దివ్య కాంతి ప్రస్ఫుటమైంది. ఆ కాంతిలో నారాయణుని సాన్నిధ్యం ప్రత్యక్షమైంది. అప్పుడు బ్రహ్మ గ్రహించాడు —“సృష్టి ఎక్కడినుంచి పుట్టిందో, కాలం ఎలా కదులుతుందో, జీవులు ఎలా పుడతాయో — అంతా ఆ నారాయణుని చిత్తమే.”

జ్ఞాతోʼసి మేʼద్య సుచిరాన్నను దేహభాజాంన జ్ఞాయతే భగవతో గతిరిత్యవద్యం ।

నాన్యత్త్వదస్తి భగవన్నపి తన్న శుద్ధంమాయాగుణవ్యతికరాద్యదురుర్విభాసి ॥

సారాంశం:

ఓ భగవంతుడా!చాలా యుగాల తపస్సు తరువాత, నిన్ను ఇప్పుడు గ్రహించగలిగాను.

దేహముతో ఉన్న జీవులు నీ స్వరూపాన్ని గ్రహించలేకపోవడం వారి దురదృష్టం.

నీవే పరమ సత్యం — నిన్ను మించినది ఏదీ లేదు.

నీకు మించినదై కనిపించినా అది మాయాగుణాల వల్లే; అది నిత్యశుద్ధం కాదు.

కథలోని లోతైన పాఠం

1. నిజమైన జ్ఞానం బయట కాదు, మనలోనే ఉంటుంది.బ్రహ్మ కూడా మొదట బయట వెతికాడు, కానీ సత్యం తెలుసుకున్నది అంతర్ముఖ ధ్యానం ద్వారానే.

2. బాహ్య పరిశోధనకు అంతు ఉండదు.కానీ ఆత్మపరిశోధన చేసినవారే శాశ్వత సత్యాన్ని గ్రహించారు. మన రుషులు అంతర్ముఖ ధ్యానం ద్వారా ప్రపంచం రహస్యాలను తెలుసుకున్నారు — గణితం, వైద్యం, సంగీతం, తత్వశాస్త్రం అన్నీ అక్కడినుంచే పుట్టాయి.

3. ఆధునిక విజ్ఞానం ఇప్పుడు ఆ మహర్షుల దర్శనాలను ఒక్కొక్కటిగా ధృవీకరిస్తోంది.

చిన్నారులారా!ఈ కథ మనకు నేర్పేది —మనలోని నారాయణుని దర్శించకుండా సృష్టి రహస్యాలు పూర్తిగా అర్థం కావు.బయట వెతికే కన్నా, మనలోని దైవస్వరూపాన్ని తెలుసుకోవడం శ్రేష్ఠం.అప్పుడే మన జీవితం నిజమైన అర్ధాన్ని పొందుతుంది.