హరికథ శక్తి

ఒక చిన్న గ్రామంలో రామయ్య అనే వృద్ధుడు ఉండేవాడు. అతను పెద్ద పండితుడు కాదు. కూలీపని చేసుకుంటూ కష్టపడడం తెలిసినవ్యక్తి. ఎక్కువ ధనం సంపాదించలేదు. కానీ ఆధ్యాత్మిక సంపద నిండుగా ఉంది. ఒక అలవాటు జీవితాంతం విడిచిపెట్టలేదు — ప్రతిరోజూ హరికథ వినడం, హరినామం జపించడం.

ప్రతి సాయంత్రం గ్రామంలో ఎవరు హరికథ చెప్పినా, రామయ్య ముందువరుసలో కూర్చునేవాడు. వినేటప్పుడు అతని కళ్లలో ఆనందబాష్పాలు మెరిసేవి.

గ్రామస్తులు కొందరు అతన్ని చూసి, “దీని వలన లాభం ఏమిటి రామయ్య?” అని నవ్వుకునేవారు.

సంవత్సరాలు గడిచాయి…

ఒక రోజు రామయ్యకు చివరి సమయం వచ్చింది. అతని కుటుంబం చుట్టూ చేరింది. సాధారణంగా ఆ సమయంలో భయం, ఆందోళన, అయోమయం కనిపిస్తాయి. కానీ రామయ్య ముఖంలో మాత్రం ప్రశాంతమైన చిరునవ్వు ఉంది.

అతను మెల్లగా “నారాయణ… నారాయణ…” అని జపిస్తూ, హరి పాదాలను ధ్యానిస్తూ, ప్రశాంతంగా కన్నుమూశాడు.

అక్కడ ఉన్న వారందరూ ఆశ్చర్యపోయారు.

అప్పుడు వారికి అర్థమయ్యింది:

“ఇదే రామయ్య నిత్యం అనుసరించిన భాగవత సారమని" —

హరికథలు వినే వారికి, హరిని తలచుకునే వారికి, మరణ సమయంలో మోహం ఉండదు.”

హరివార్తలెఱుగు వారికి హరిపదములు తలచువారి కనవరతంబున్ ।

హరికథలు వినెడివారికి మరణాగతమోహసంభ్రమము లేదనఘా ॥

అర్థం

హరినామం, హరి కథలు తెలిసిన వారికి, హరిపాదాలను ఎప్పుడూ తలచుకునే వారికి,

హరి కథలను ఆస్వాదిస్తూ వినే వారికి— మరణ సమయములో కలిగే భయం, అయోమయం, మోహం ఏవీ ఉండవు, ఓ నిర్దోషుడా!

హరి కథలు → మనస్సును శుద్ధి చేస్తాయి

హరి స్మరణ → మనస్సుకు స్థిరత్వం ఇస్తుంది

ఫలితం → అంతిమ సమయంలో కూడా భయం ఉండదు

పైన పోతన భాగవత పద్యం మనకు చెప్పేది ఏమిటంటే -

రోజూ మనం ఏం ఆలోచిస్తామో, ఏం వింటామో, ఏం ఆచరిస్తామో—అదే మన చివరి క్షణాన్ని నిర్ణయిస్తుంది.

👉 హరి స్మరణతో జీవితం గడిస్తే, మరణం కూడా ప్రశాంతంగా మారుతుంది.

👉 సందేశం:

“ఎలా జీవిస్తామో, అలాగే చివరి క్షణం ఉంటుంది.”

ఆలోచన: హిందూమిత్ర Dr మల్లాది శ్రీనివాస శాస్త్రి